இனிது இனிது ; ஸ்பெஷல் ஹைலைட்ஸ்
நடிகர் பிரகாஷ் ராஜ் தயாரிப்பில் உருவாகியிருக்கும் புதிய படம் இனிது இனிது. தெலுங்கில் 2007ம் ஆண்டு தமன்னா மற்றும் புதுமுகங்கள் நடித்து வெற்றி பெற்ற ஹேப்பிடேஸ் படமே தமிழில் இனிது இனிதாக உருவாகியிருக்கிறது. இப்படத்தின் ஸபெஷல் ஹைலைட்ஸ் :
* அபியும் நானும், பயணம் மற்றும் இந்தி குஷி உள்ளிட்ட படங்களில் ஒளிப்பதிவாளராக பணியாற்றிய குகனே இப்படத்தின் மூலம் இயக்குனராக அறிமுகம் ஆகிறார்.
* இரண்டாயிரத்திற்கும் மேற்பட்ட புதுமுகங்கள் வாய்ப்பு கேட்டு விண்ணப்பித்ததில் 60 பேரை தேர்ந்தெடுத்து அதிலிருந்து 8 பேர் முக்கிய கதாபாத்திரங்களில் நடிக்க வைக்கப் பட்டுள்ளனர். இவர்கள் அனைவரும் சென்னையை சேர்ந்தவர்கள்.
* தெலுங்கில் ஹிட்டான இரண்டு பாடல்களின் ட்யூன்களை மட்டும் தமிழில் பயன்படுத்தியிருக்கிறார் இயக்குனர்.
* மொழி தெரியாமல் இருந்தும் வைரமுத்து தமிழில் எழுதிய பாடலை ஆங்கிலத்தில் மொழிபெயர்த்து அதன் பொருளை உணர்ந்து தமிழுக்கு பொருந்தும்படி இசையமைத்துள்ளார் மிக்கி ஜே.மேயர்.
* தனது டூயட் மூவிஸ் சார்பில் பிரகாஷ் ராஜ் இப்படத்தை தயாரித்திருந்தாலும் படத்தில் ஒரு காட்சியில் கூட அவர் நடிக்கவில்லை.
* வேலூரில் உள்ள பிரபல கல்லூரி ஒன்றில் மிகவும் போராடி அனுமதி பெற்று இப்படத்தை எடுத்துள்ளனர். முன்னூறு ஏக்கர் பரப்பளவில் அமைந்துள்ள அந்த கல்லூரியின் நிர்வாகம் கொடுத்த அனைத்து நிபந்தனைகளையும் ஏற்று 45 நாட்களுக்குள் அங்கு படப்பிடிப்பு நடத்தி முடித்துள்ளனர்.
* கேரளாவின் வயநாடு பகுதியில் மழைக்காலத்தை தெரிந்து கொண்டு நடப்பு பற்றி பாடலை படமாக்கியுள்ளார் இயக்குனர். படத்தின் ஒளிப்பதிவும் இவரே என்பதால் அனைத்து பாடல் காட்சிகளையும் ரசித்து படமாக்கியிருக்கிறார்.
* படத்தின் அத்தனை பாடல்களுக்கும் நடன இயக்குனராக பணியாற்றி இருப்பவர் மும்பையை சேர்ந்த போனி வர்மா. படத்தில் ஏராளமான புதுமுகங்கள் இருந்தாலும் அத்தனை பேருடனும் சகஜமாக பழகி, பாடல் காட்சிகளை சிறப்பாக படமாக்கி கொடுத்திருக்கிறார்.
Link to this page
